خەلقئارا شەرقىي تۈركىستان تەشكىلاتلار بىرلىكىنىڭ كېڭەيتىلگەن ئالىي كېڭىشى ئۆتكۈزۈلدى

6- يانۋار، جۈمە كۈنى ، خەلقئارا شەرقىي تۈركىستان تەشكىلاتلار بىرلىكىنىڭ كېڭەيتىلگەن ئالىي كېڭىشى ئىستانبۇل ۋالىلىقى يىغىن زالىدا ئۆتكۈزۈلدى.

شەرقىي تۈركىستان جەمئىيىتىنىڭ ھەرقايسى قاتلاملىرى، تۈركىيە ۋە ھەر قايسى دۆلەتلەردىن كەلگەن ھەر ساھەدىكى ئاممىۋى تەشكىلاتلارنىڭ باشلىقلىرى ، ئۆلىمالار ، ئاكادېمىكلار ، جامائەت ئەربابلىرىدىن تەركىب تاپقان خەلقئارا شەرقىي تۈركىستان تەشكىلاتلار بىرلىكىنىڭ كېڭەيتىلگەن ئالىي كېڭىشى 2023-يىللىق 1- قېتىملىق يىغىنى 6-يانۋار ئىستانبۇلدا ئۆتكۈزۈلدى.

كېڭەش خەلقئارا شەرقىي تۈركىستان تەشكىلاتلار بىرلىكىنىڭ باش كاتىپى ئابدۇرېشىد ئەمىنھاجىنىڭ رىياسەتچىلىكىدە ئېچىلدى ۋە  شەرقىي تۈركىستان ۋە تۈركىيەنىڭ دۆلەت شېئىرىنى ئۇقۇش بىلەن باشلاندى. ئۇنىڭدىن كېيىن ، بىرلىك رەئىسى ھىدايەت ئوغۇزخان ئېچىلىش نۇتقى سۆزلىدى ۋە بىرلىكنى قوللىغان ۋە ھەر ساھەدىن يىغىن قاتناشقۇچىلارغا رەھمەت ئېيتتى. كىيىن ئۇ بىرلىكنىڭ سىياسىي پرىنسىپى ، ئىستراتېگىيىسى ۋە نىشانىنى تونۇشتۇردى.

شەرقىي تۈركىستان ئۆلىمالار بىرلىكىنىڭ رەئىسى ئۇستاز ئاتاۋۇللا شاھيار سۆز قىلىپ، شەرقىي تۈركىستان مۇستەقىللىق كۆرىشىدە تەشكىللىك  ھەرىكەت قىلىشنىڭ مۇھىملىقىنى تەكىتلىدى.

كېڭەش خەلقئارا شەرقىي تۈركىستان تەشكىلاتلار بىرلىكىنىڭ باش كاتىپى ئابدۇرېشىد ئەمىنھاجىنىڭ  بىرلىكنىڭ نىزامنامىسىنى كېڭەش ئەزالىرىغا ئۇقۇپ ئۆتىشى بىلەن داۋام قىلدى ۋە بىرلىكنىڭ 2022-يىللىق خىزمەت دوكلاتىنى ئۇقۇپ ئۆتتى. ئاخىرىدا 2023-يىللىق خىزمەت پىلانىنى ئورتاقلاشتى.

ئاندىن ، بىرلىكنىڭ مالىيە كومىتېتىنىڭ رەئىسى نىزامىددىن تەمكىنى 2022- يىللىق مالىيە دوكلاتى ۋە 2023- يىللىق خامچوت پىلانىدىن دوكلات بەردى.

يىغىن كېڭەشكە قاتناشقان ئەزالارنىڭ تەكلىپ-پىكىرلىرى ۋە تەۋسىيەلىرى بىلەن ئاخىرلاشتى.